O‘zbek olimlari yangi pomidor navini yaratdi
U boshqa navlarga qaraganda 20 foiz ko‘proq hosil beradi.
Qishloq xo‘jaligi vazirligi huzuridagi Sabzavot, poliz ekinlari va kartoshkachilik ilmiy-tadqiqot institutining bir qator seletsioner olimlari ochiq maydon va issiqxonada yetishtirishga mos pomidor navi ixtiro qildi. Bu haqda vazirlik matbuot xizmati xabar berdi.
Qayd etilishicha, Yekaterina Lyan, Rustam Nizomov, Shermuhammad Aminov va Jamil To‘rayev kabi olimlarning o‘n yillik mehnati natijasida ushbu nav yaratilgan. Unga “Universal” deb nom berilgan.
Yangi nav o‘rtapishar bo‘lib, o‘sish davri 120–122 kunni tashkil etadi. Asosiy poyasining uzunligi issiqxonada 2–2,5 metr, ochiq maydonda 1,5–1,8 metrgacha yetadi. Shoxlanishi va barglanishi esa o‘rtacha. Bargi oddiy, to‘q yashil, o‘rtacha burmali bo‘ladi.
Tarkibida quruq modda miqdori 4,8 foiz, umumiy qand 4,2 foiz, askorbin kislotasi 24,2 foiz. Issiqxonada 15–18 kilogramm, ochiq maydonda 38–42 ta hosil beradi. Bu ko‘rsatkich boshqa navlardan 15-20 foizga yuqori degani.
Pomidorning “Universal” navini respublikada keng joriy etish, birlamchi urug‘chiligini o‘rnatilgan tartibda tashkil etish uchun nav xujjatlar rasmiylashtirilgan. Qishloq xo‘jaligi ekinlari navlarini sinash markaziga Davlat reyestiriga kiritish uchun va Intellektual mulk agentligiga patentlash uchun taqdim etildi.
