Jizzaxda ekstremistik oqim tarafdori ushlandi
U Instagramda aqidaparastlik g‘oyalarini tarqatib kelgan.
Jizzax viloyatida yashovchi diniy ekstremistik oqim tarafdoriga nisbatan jinoyat ishi qo‘zg‘atildi. Bu haqda O‘zA axborot agentligi xabar berdi.
Qayd etilishicha, 1995-yilda Jizzax viloyatida tug‘ilgan S.A. ismli fuqaro ma’lum vaqt davomida diniy akidaparastlik g‘oyalari bilan yo‘g‘rilgan materiallarni uyali telefoni orqali muntazam ravishda tarqatib kelgan.
U o‘zining uyali telefonidagi instagram ijtimoiy tarmog‘i va telegram messenjerida akkaunt yaratib, u orqali ekstremistik ruhdagi materiallar xalqaro terroristik tashkilotlar va diniy ekstremistik oqimlarning g‘oyaviy rahnamolari bo‘lgan – Sodiq Samarqandiy, Abu Saloh, Abdulloh Zufar va boshqalarning akidaparastlik g‘oyalari tarqatgan.
Viloyat DXX va IIB xodimlari tomonidan o‘tkazilgan tezkor tadbir davomida S.A. qo‘lga olinib, uning mobil telefoni prosessual tartibda rasmiylashtirildi. Vazirlar Mahkamasi huzuridagi Din ishlari bo‘yicha qo‘mitaning ekspertiza xulosasiga ko‘ra, uning telefon apparati xotirasida saqlangan materiallar to‘liq aqidaparastlik g‘oyalari bilan yo‘g‘rilgan bo‘lib, ularni O‘zbekiston Respublikasi hududiga olib kirish, tayyorlash va tarqatish taqiqlangan.
Hozirda fuqaroga nisbatan mutasaddi idora xodimlari tomonidan qo‘zg‘atilgan jinoyat ishi doirasida tergov harakatlari olib borilmoqda.
