Toshkent viloyatida 25 ta xonadonni suv bosdi
FVV hodisa oqibatlari haqida ma’lumot berdi.
Kecha, 14 may kuni Toshkent viloyati Yuqorichirchiq tumanida kuchli yog‘igarchilik kuzatildi. Bu haqda FVV axborot xizmati xabar berdi.
Ma’lum qilinishicha, kuchli yog‘ingarchilik oqibatida tumanning “Navbahor” MFY hududidan oqib o‘tuvchi “Yayilmasoy” o‘zanida yomg‘ir suvlari toshishi sodir bo‘lib, “Obod turmush” ko‘chasida joylashgan taxminan 25 ta aholi xonadonlari va tomorqa yer maydonlariga suv kirgan. Shuningdek, hodisada “Navbahor” mahallasi “Obod turmush” ko‘chasi hududidagi poydevorga ega bo‘lmagan xom g‘ishtdan qurilgan xonadon binosiga zarar yetgan.
“Mazkur holat oqibatida fuqarolarning tan jarohati olishi va uy hayvonlari nobud bo‘lishi to‘g‘risida ma’lumotlar kelib tushmadi”, — deyiladi xabarda.
Hozirda tegishli tashkilotlar tomonidan toshqin suvlarining talofati bartaraf etilgan.
