Jizzaxda 300 kg sifatsiz go‘sht aniqlandi
Jami 14 bosh qo‘y go‘shti Toshkentga olib ketilayotgan vaqtida to‘xtatib qolingan.
Jizzax viloyatining Do‘stlik tumanidagi “Manas–14” yo‘l patrul xizmati maskanida 300 kg iste’molga yaroqsiz go‘sht aniqlandi. Bu haqda IIV axborot xizmati xabar berdi.
Qayd etilishicha, IIB xodimlari “Ford” rusumli avtomashinani to‘xtatib, uning ichini tekshirgan. Mazkur jarayonda mashina yukxonasida 14 bosh qo‘yning 300 kilogramm go‘shti sanitariya talablariga zid ravishda olib ketilayotgani aniqlangan. Go‘shtning egasi mahsulotga oid hujjatlarni taqdim etmagan va yukni Toshkentga olib ketayotgani ma’lum qilgan.
Holat yuzasidan tegishli hujjatlar rasmiylashtirilib, go‘sht mahsulotlari saqlash uchun Jizzax shahri elektr tarmoqlari korxonasiga qarashli muzxonaga joylashtirilgan.
“Hozirgi kunda tergovga qadar tekshiruv harakatlari olib boryapmiz. Mahsulot veterinariya-ekspertiza xulosasiga ko‘ra, yaroqli deb topilsa, go‘sht o‘z egalariga qaytarib beriladi. Agar iste’mol uchun yaroqsiz deb topilsa, yoqib yo‘q qilinadi”, — deyiladi xabarda.
