“NestOne”da ishlagan 739 kishi oyliksiz qolib, namoyish o‘tkazdi
Jami 2 mlrddan ortiq maosh o‘z vaqtida to‘lanmagani aniqlandi.
Ijtimoiy tarmoqda “Tashkent city” hududidagi “NestOne” binosi qurilishida ishlayotgan ishchilarning maoshi o‘z vaqtida berilmagani haqida xabarlar tarqaldi. Holat yuzasidan Bandlik va mehnat munosabatlari vazirligi rasmiy munosabat bildirdi.
Ma’lum qilinishicha, bugun, 17 may kuni Toshkent shaxar davlat mehnat inspeksiyasi tomonidan tarqalgan xabarlar bo‘yicha o‘rganish olib borilgan. O‘rganish davomida “Nestone” qurilishida ishlayotgan 312 nafar ishchining aprel oyi ish haqlari uchun 1 mlrddar ziyod (1 007 001 825.87) maosh “Ozguvn mimarlik inshaat” MCHJ XK tomonidan o‘z vaqtida to‘lab berilmagani aniqlangan. Shu kunning o‘zida ishchilarning maoshi to‘lab berilishi ta’minlangan.
Shuningdek, “Nestone” qurilishida ishlayotgan “Ozguven tasarim mimarlik insaat sanayi ve ticar” PUning 427 nafar ishchisi ham aprel oyi uchun ish haqi olishmagan. Norozilik namoyishidan so‘ng ularning 1 mlrddan ziyod (1 346 355 177.06) maoshi to‘lab berilgan.
Bundan tashqari, O‘zbekiston Respublikasi Vazirlar Mahkamasining “Davlat mehnat inspeksiyasi to‘g‘risida”gi 1066-sonli Nizomiga muvofiq, Toshkent shahar Davlat mehnat inspeksiyasi tomonidan 2022 yil 17 may kuni Ozguvn mimarlik inshaat” MCHJ XK va ”Ozguven tasarim mimarlik” MCHJ shaklidagi xorijiy korxonasi rahbari Guven Mehmetra nomiga yozma ko‘rsatma berilgan.
