Shavkat Mirziyoyev Qozog‘iston Prezidentini tabrikladi
Qutlov Qosim-Jomart To‘qayevning tug‘ilgan kuni munosabati bilan amalga oshirilgan.
Bugun, 17-may kuni Shavkat Mirziyoyev Qozog‘iston Respublikasi Prezidenti Qasim-Jomart Toqayev bilan telefon orqali muloqot qildi. Bu haqda Prezident matbuot xizmati xabar berdi.
Davlat rahbari Qozog‘iston Prezidentini tavallud kuni bilan samimiy muborakbod etib, unga mustahkam sog‘lik, baxt-saodat va muvaffaqiyatlar, birodar Qozog‘istonga tinchlik-osoyishtalik va ravnaq tilagan.
O‘zbekiston-Qozog‘iston do‘stlik, yaxshi qo‘shnichilik, strategik sheriklik va ittifoqchilik munosabatlari jadal rivojlanib borayotgani katta mamnuniyat bilan qayd etilgan.
Qayd etilishicha, joriy yil boshidan o‘zaro savdo ko‘rsatkichlari barqaror oshib bormoqda. Yaqinda ikki mamalakat o‘rtasida temir yo‘lda yo‘lovchi tashish qayta tiklangan.
Shuningdek, O‘zbekiston va Qozog‘iston hukumat delegasiyalari o‘tkazgan muzokaralarning amaliy natijalari yuqori baholangan. Qo‘shma kooperasiya loyihalarini tayyorlash va amalga oshirishni jadallashtirish muhim ekani ta’kidlangan.
Ikki mamlakat yetakchilari xalqaro kun tartibi va mintaqaviy hamkorlikni kengaytirishning dolzarb masalalari yuzasidan ham fikr almashgan.
