Toshkentda soxta DTM xodimi ushlandi
U fuqaroni o‘qishga kiritish uchun 6500 dollar olgan vaqtida qo‘lga tushgan.
Namangan viloyati Norin tumanida fuqaroni o‘qishga kiritib qo‘yishni va’da qilgan firibgar uning sherigi ushlandi. Bu haqda Bosh prokuratura huzuridagi iqtisodiy jinoyatlarga qarshi kurashish departamenti xabar berdi.
Qayd etilishicha, Departamentning Norin tumani va DXXning Uchqo‘rg‘on tumanlararo bo‘limlari tomonidan tezkor tadbir o‘tkazilgan. Unda fuqaro Q.N. boshqa bir fuqaro Sh.ni go‘yoki Davlat test markazida ishlovchi tanishi orqali o‘qishga kiritib qo‘yishni va’da qilib, evaziga 7 000 AQSH dollarini olgan vaqtida ushlangan. Uning ko‘rsatuviga asosan Toshkent shahrida davom etgan tadbirda Shayxontohur tumanida istiqomat qiluvchi fuqaro S.B. fuqaro Sh.ni Namangan muhandislik texnologiya institutining iqtisodiyot fakultetiga o‘qishga kiritib qo‘yish evaziga 6 500 AQSH dollarini olgan vaqtida ashyoviy dalillar bilan qo‘lga tushgan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
