Andijonda yigit va qiz o‘zini uy tomidan tashlamoqchi bo‘lgani aytildi
Holat yuzasidan viloyat IIB ma’lumot berdi.
Ijtimoiy tarmoqda Andijon viloyati Xo‘jaobod tumanida ikki kishi o‘zini ko‘p qavatli uyning tomidan tashlamoqchi bo‘lgani aks etgan videolavha tarqaldi. Holat yuzasidan viloyat IIB rasmiy munosabat bildirdi.
Aniqlanishicha, bugun, 20 may kuni soat 17:20 atrofida Xo‘jaobod tumani “Mustaqillikning 30 yilligi” MFY hududida joylashgan ko‘p qavatli uyda yashovchi “X” ismli shaxs “M” ismli shaxs bilan birga atrofni tomosha qilish maqsadida ko‘p qavatli uyning tom qismiga chiqishgan. Ayni shu paytda mazkur hududda yashovchi fuqarolar go‘yoki ularni tomdan o‘zlarini tashlab yuborish niyatida chiqqan deb, video tasvirga olishgan.
Ushbu holat yuzasidan Andijon viloyati IIVning 102 ishonch raqamiga murojaat kelib tushgan va Xo‘jaobod tumani IIB mas’ul xodimlari voqea joyiga borib, holat bo‘yicha surishtiruv ishlari olib borgan. “X” va “M” ismli shaxslar o‘z tushuntirish xatida u yerda atrofni tomosha qilib, o‘zaro gaplashib o‘tirishganini va o‘zlarini tashlab yuborish niyati bo‘lmaganini ma’lum qilgan.
Mazkur holat yuzasidan fuqarolar “X” va “M”lar bilan yakka tartibda suhbat o‘tkazilib, profilaktik ishlar amalga oshirilgan.
