Namanganda sel suvlari avtomobil ko‘prigiga zarar yetkazdi
Hozirda viloyat FVB va uning quyi tizimlari shay holatga keltirilgan.
Bugun, 22-may kuni Namangan viloyati Yangiqo‘rg‘on tumanida kuchli sel kelishi kuzatildi. Holat bo‘yicha viloyat FVB tezkor munosabat bildirdi.
Xabar qilinishicha, sel oqibatida “Iskovot–Baliqko‘l” avtomobil yo‘lining 6-7 kilometrida joylashgan ko‘prikning chap tomoni qisman yemirilgan. Ushbu hududdagi aholi yashash xonadonlari va ekin maydonlariga zarar yetmagan.
“Hozirda ko‘prik to‘liq nazoratga olingan. Sel kelish xavfini oldini olish va uni bartaraf etish maqsadida Namangan viloyati Favqulodda vaziyatlar boshqarmasi va Favqulodda vaziyatlarda davlat quyi tizimlari kun-u tun shay holatda”, — deyiladi xabarda.
Eslatib o‘tamiz, avvalroq Samarqand viloyatining Samarqand tumanida kuchli sel kelgandi. Oqibatda fuqaroga tegishli “Jiguli”ga texnik zarar yetgan.
Javohirbek TURSUNOV
