OTBda anʼanaviy ravishda G20 davlatlari egallab kelgan lavozimga O‘zbekiston vakilini tayinlash taklif qilindi
Sardor Umrzoqov OTB vitse-prezidenti bilan uchrashdi
Investitsiyalar va tashqi savdo vazirligida Bosh vazir o‘rinbosari - investitsiyalar va tashqi savdo vaziri S.Umurzakov Osiyo taraqqiyot banki (OTB) vitse-prezidenti Ashok Lavas bilan uchrashdi.
Uchrashuv chog‘ida O‘zbekiston va OTB o‘rtasidagi ikki tomonlama hamkorlikning bugungi holati va uni kengaytirish istiqbollari muhokama qilindi.
OTB rahbariyati so‘nggi yillarda O‘zbekistonda iqtisodiyotning deyarli barcha tarmoqlarida xususiy sektorning rolini mustahkamlash uchun keng imkoniyatlar yaratilganini maʼlum qildi. Shu munosabat bilan xususiy sektor loyihalarini, ayniqsa, ayollar va yoshlar tadbirkorligini qo‘llab-quvvatlash uchun Bank resurslarini jalb qilishni kengaytirish masalalari muhokama qilindi.
Tomonlar infratuzilmani rivojlantirish, sog‘liqni saqlash, taʼlim va ijtimoiy sohalarda davlat-xususiy sheriklik mexanizmlaridan foydalangan holda qo‘shma loyihalarni ko‘rib chiqdilar. Ashok Lavasa Bank DXSH sohasidagi hamkorlikni kengaytirishdan manfaatdor ekanligini taʼkidladi. DXSH mexanizmlaridan foydalangan holda Toshkent shahri va Toshkent viloyatidagi maktab va boshqa muassasalarni modernizatsiya qilish, shuningdek, Andijon va Buxoroda ko‘p tarmoqli shifoxonalar qurish loyihalarining hamkorlik kun tartibiga kiritilgani bundan dalolat beradi.
Uchrashuv davomida amaldagi loyihalarni ilgari surish, transport, elektr energiyasi va sog‘liqni saqlash sohalarida loyihalarni amalga oshirish uchun davlat-xususiy sheriklik mexanizmini ishlab chiqish va joriy etishga OTB mutaxassislarini jalb qilish, O‘zbekistonda tijorat banklariga taqdim etilayotgan kredit liniyalari hajmini kengaytirish bo‘yicha chora-tadbirlar kelishib olindi.
Shuningdek, alohida loyiha va tashabbuslar bilan bog‘liq masalalar, jumladan, mamlakatimiz hududlaridagi boshlang‘ich maktablarni modernizatsiya qilish va jihozlash dasturi, “O‘rta taʼlimda STEM (fan, texnologiyalar, muhandislik va matematika) metodologiyasini joriy etish” loyihasi, shuningdek, “We-Fi” tadbirkor ayollarni qo‘llab-quvvatlash dasturi ko‘rib chiqildi.
Uchrashuv yakunida vitse-prezident A.Lavasa OTB Prezidentining Bank Prezidenti, vitse-prezidentlari va OTB Direktorlar Kengashi aʼzolarining ish haqi darajasini belgilovchi OTBning mukofotlash bo‘yicha qo‘mitasi raisi lavozimiga O‘zbekistondan Boshqaruvchi nomzodini ko‘rsatish to‘g‘risidagi qarori haqida maʼlum qildi. Ilgari bu lavozim anʼanaviy ravishda G20 mamlakatlari vakillari tomonidan egallab kelingan.
