Toshkentda yuz bergan YTHda haydovchi va 1 yoshli bola halok bo‘ldi
Shuningdek, yana 3 nafar shaxs shifoxonaga yotqizilgan.
Toshkent viloyati Bekobod shahrida 2 ta avtomobil ishtirokida yo‘l-transport hodisasi sodir bo‘ldi. Holat bo‘yicha viloyat IIB YHXB rasmiy ma’lumot berdi.
Qayd etilishicha, voqea kecha, 22-may kuni “Sirdaryo–Dehqonobod–Bekobod” avtomobil yo‘lining 99-kilometrida yuz bergan. 1982 yilda tug‘ilgan haydovchi J.G. “Vaz-2104” rusumli avtomobilda o‘zidan oldinda bo‘lgan transportni quvib o‘tish maqsadida yo‘lning qarama-qarshi tomoniga chiqqan va ro‘parasidan kelayotgan “Сobalt” bilan to‘qnashib ketgan.
Hodisa oqibatida “Vaz-2104” haydovchisi J.G. va “Сobalt”da bo‘lgan 1 yoshli yo‘lovchi S.A. og‘ir tan jarohatlari olib, voqea joyida vafot etgan. Shuningdek, “Kobalt” haydovchisi O.I. va ushbu avtomobilning bir nafar yo‘lovchisi N.I. hamda “Vaz-2104” avtomobilida bo‘lgan 9 yoshli yo‘lovchi A.S.lar tan jarohati olib, shifoxonaga yotqizilgan.
