"Agar chindan ham qayg‘urayotgan bo‘lsangiz, qurol yuboring!"
Ukraina tashqi ishlar vaziri mamlakat sharqidagi vaziyat hamma o‘ylagandan ham yomonroq ekanidan ogohlantirdi.
Dmitriy Kuleba Twitter‘da o‘z obunachilari tomonidan yuborilgan savollarga to‘g‘ridan-to‘g‘ri javob berar ekan, Ukraina ko‘proq qurolga muhtojligini aytdi.
"Qurol, qurol va yana bir bor qurol, — dedi Kuleba xalqaro hamjamiyatga murojaatida. — Biz artilleriyasiz, raketa tizimlarisiz rus qo‘shinlarini ortga qaytara olmaymiz. Agar siz haqiqatan ham Ukraina haqida qayg‘ursangiz, Ukraina o‘z hududlarini qaytarib olishini istasangiz, bizga imkon qadar tezroq raketa tizimlarini yuboring".
Uning eslatishicha, bir muddat avval Qo‘shma Shtatlar ushbu qurollarni yetkazib berishini aytgan, biroq hozircha yetkazib berilmagan.
"Bizning ulardan yagona iltimosimiz bu qarorni imkon qadar tezroq qabul qilishdir, chunki biz uchun har bir kun halok bo‘lganlar, yo‘qolgan kilometrlar degani", — dedi Kuleba.
Uning fikricha, boshqa davlatlar ham o‘zlari shunday qaror qabul qilishdan oldin AQSHning bu qadamini kutishmoqda. Kulebaning taʼkidlashicha, ukraina raketa tizimlarini qabul qilsa va yetarlicha og‘ir qurollarga ega bo‘lsa, Xersonni ozod qila oladi.
CNN telekanali nomi oshkor etilmagan bir qancha rasmiylarga tayanib, Bayden maʼmuriyati Ukrainaga Kiyev so‘ragan ilg‘or uzoq masofali raketa tizimlarini yetkazib berishga tayyorlanayotgani haqida xabar berdi.
Teleradiokompaniya manbalariga ko‘ra, maʼmuriyat kelgusi haftada eʼlon qilinishi mumkin bo‘lgan kattaroq harbiy yordam paketining bir qismi sifatida tizimlarni joylashtirishga intilmoqda.
So‘nggi kunlarda AQSH maʼmuriyati va NATO rahbariyati Ukrainaga avvaldan vaʼda qilingan og‘ir qurollarni topshirishni kechiktirgani uchun ham Ukraina rasmiylari, ham baʼzi G‘arb siyosatchilari tomonidan tanqid ostiga olindi.
