Buyuk Britaniya ko‘plab basseynlaridan ayrilishi mumkin
Bunga nima sabab bo‘lishi ochiqlandi.
Buyuk Britaniya suzish havzalari energetik inqiroz va qarzlar tufayli yopilishi mumkin. Bu haqda Financial Times gazetasi xabar berdi.
Suzish britaniyaliklar orasida eng mashhur sport turlaridan biri sanaladi. Ammo pandemiyadan avval Swim England yirik operatorlar jamiyati 2030 yilga kelib mamlakatdagi basseynlarning yarmi yopilishini maʼlum qilgandi. Bunga infratuzilma eskirgani sabab qilib ko‘rsatilgan.
Endilikda ushbu muammo qatoriga elektr narxining ko‘tarilishi ham qo‘shilgan.
“Pandemiyadan keyin qarzlarning ko‘payishi hamda 2019 yilga nisbatan elektr narxining 100-150 foizga oshishi ortidan faoliyati to‘xtatiladigan basseynlar soni ortishi mumkin”, – degan Swim England rahbari Jeyn Nikerson.
Uning qo‘shimcha qilishicha, mamlakatdagi istalgan suzish havzasi yopilishi ehtimoli bor.
Avvalroq elektr narxining keskin oshishi oqibatida Madridda metro faoliyatiga cheklov o‘rnatilgani to‘g‘risida xabar berilgandi.
