Rus elchisi Moskvaning Ukrainaga nisbatan yadro quroli ishlatishini rad etdi
U, shuningdek, taktik qurollar qanday holatda qo‘llanishini aytib o‘tgan.
Moskva Ukrainadagi harbiy mojaroda yadro qurollaridan foydalanmaydi. Bu haqda Rossiyaning Buyuk Britaniyadagi elchisi Andrey Kelin “BBC” telekanaliga bergan intervyusida ma’lum qildi.
Uning aytishicha, taktik qurollar Ukrainadagi kabi mojarolarda qo‘llanilmaydi. Bu harbiy doktrinada belgilab qo‘yilgan. Mamlakat xavfsizligiga tahdid bo‘lgan taqdirdagina yadro qurollar ishlatilishi mumkin.
“Buning (yadro qurollarining) hozirgi operatsiyaga aloqasi yo‘q”, — degan elchi.
Telekanal ma’lumotlariga ko‘ra, Rossiyada taxminan 2000 ga yaqin taktik yadro qurollari mavjud. Ular nisbatan qisqa masofalarda qo‘llanilishi mumkin. Ushbu turkumga jang maydonida ishlatiladigan kichikroq bombalar va raketalar kiradi.
