Germaniya o‘zbekistonlik hamshiralarga ish taklif qilmoqda
Oylik maosh esa 2 ming dollardan yuqori.
Shveysariyaning “GLOBOGATE Concept AG.” kompaniyasi tibbiyot sohasida oliy yoki o‘rta maxsus ma’lumotga ega o‘zbekistonliklarni ishga oladi. Bu haqda Tashqi mehnat migratsiyasi agentligi matbuot xizmati xabar berdi.
O‘rta maxsus ma’lumotga ega nomzodlar ham ishga qabul qilinishi mumkin.
Nomzodlar uchun talablar:
• Umumiy hamshiralik uchun – shifoxonaning turli bo‘limlarida kamida 2 yillik tajribaga ega hamshiralar (faqat bemorlarni parvarishlagan) bo‘lishi;
• 39 yoshdan oshmagan bo‘lishi va shifoxonada ish tajribasiga ega bo‘lishi (stomatolog, o‘qituvchilik va dorishunoslik sohasida shug‘ullangan nomzodlar qabul qilinmaydi);
• sudlanmagan, jismonan sog‘lom, tibbiyot kolleji/texnikumini (faqat 3 yillik diplom yoki OMX) tamomlagan, bemorlarga g‘amxo‘rlik qilish qobiliyatiga ega bo‘lishi;
• Toshkent shahrida tashkil etiladigan nemis tili kurslarida 10 oy davomida o‘qish (2 bosqichli tanlovlardan muvaffaqiyatli o‘tgan nomzodlargina dasturda ishtirok etadi);
• nomzodlar nemis tili kurslarida qatnashayotgan vaqtda mehnat faoliyati bilan shug‘ullanmasligi hamda Toshkent shahridagi Gyote instituti imtihonlaridan muvaffaqiyatli o‘tishi kerak.
Loyihada ishtirok etish istagida bo‘lgan fuqarolarga Toshkent shahrida bepul turar joy, o‘quv xonasi va oylik stipendiya sharoitlari yaratib beriladi.
