Toshkentda Gazel haydovchisi piyodani urib ketdi
Shahar IIBB hodisa bo‘yicha ma’lumot berdi.
Toshkent shahri Yunusobod tumanida 1-iyun kuni Gazel haydovchisi piyodani urib yubordi. Holat bo‘yicha shahar IIBB ma’lumot berdi.
Qayd etilishicha, 1978 yilda tug‘ilgan haydovchi I. Q. Gazel rusumli avtomashinasida Amir Temur ko‘chasi bo‘ylab harakatlanayotib, tartibga solinmagan piyodalar o‘tish joyidan yo‘lni kesib o‘tayotgan fuqaroni urib yuborgan. Oqibatda 1989-yilda tug‘ilgan piyoda F. X. tan jarohatlari olib, kasalxonaga yotqizilgan.
Hozirda mazkur holat yuzasidan Toshkent shahar IIBB YHXB xodimlari tomonidan tergovga qadar tekshiruv o‘tkazilmoqda.
Eslatib o‘tamiz, bundan oldin Toshkent viloyati Parkent tumanida 26 yoshli haydovchi Lacetti avtomashinasida yo‘l chetida ketayotgan piyodani urib ketgandi.
Javohirbek TURSUNOV
