Andijonda 3 ta tuman IIB boshlig‘i o‘rinbosari ishdan olindi
Shuningdek, fuqarolarning muammolariga yetarli e’tibor qaratmagan bir guruh sektor rahbarlari qat’iy ogohlantirildi.
O‘zbekiston Respublikasi Prezidenti maslahatchisi Baxtiyor Islamov hamda Ichki ishlar vaziri Po‘lat Bobojonov, respublika harbiy prokurori Shuhrat Uzoqovlar boshchiligidagi idoralararo respublika ishchi guruhi bir hafta davomida Andijon viloyatining tuman-shaharlarida bo‘lib, inson qadri uchun amalga oshirilayotgan islohotlarni natijadorligi manzilli o‘rganildi va tahlil qilindi. Bu haqda IIV axborot xizmati xabar berdi.
Qayd etilishicha, o‘rganish ishlari yakunida Andijon viloyati hokimligi majlislar zalida viloyat hamda tuman-shahar sektor rahbarlari, korxona va tashkilotlarning boshliqlari hamda boshqa mas’ullar ishtirokida tanqidiy-tahliliy yig‘ilish bo‘lib o‘tgan.
Unda O‘zbekiston Respublikasi Prezidenti maslahatchisi Baxtiyor Islamov tomonidan viloyatda aholi murojaatlari bilan ishlash ahvoli qoniqarli darajada emasligi qattiq tanqid ostiga olingan. Jumladan, joriy yil boshidan shu kunga qadar jismoniy va yuridik shaxslar tomonidan 50 mingta murojaat kelib tushgan bo‘lib, shundan 24 foizi ijobiy hal etilgan bo‘lsa, qolgan 72 foiziga esa mutasaddilar tomonidan to‘g‘ri tushuntirish bilan cheklanilgan, xolos.
Viloyatdagi bir qator tuman-shaharlarda rejada belgilanib olingan sayyor qabullar o‘tkazilmaganligi, huquqiy targ‘ibot ishlarini yetarli darajada tashkil etilmaganligi, yoshlarning bo‘sh vaqtlarini samarali tashkil etishga qaratilgan ishlarning sust tashkil etilganligi tanqidiy tahlil qilingan. Viloyatda korrupsiya holatiga yo‘l qo‘yib berilishi, uning oldini olishga qaratilgan kechiktirib bo‘lmaydigan ishlarning tashkil etilishi qoniqarli deb topilib alohida ta’kidlangan.
Ishchi guruh a’zolarining o‘rganish natijalariga ko‘ra fuqarolarning muammolariga yetarli e’tibor qaratmagan, ularni hal etishga sust munosabatda bo‘lgan bir qator tuman-shaharlarning sektor rahbarlari qat’iy ogohlantirilgan.
Bundan tashqari, joylarda sodir etilayotgan jinoyatlarning muhokama yig‘ilishlari talab darajasida tashkil etilmayotganligi, oldini olish mumkin bo‘lgan jinoyatlarning barvaqt oldini olishga qaratilgan ishlar sust tashkil etilganligi tanqidiy muhokama qilingan va yuqoridagi kabi holatlarga yo‘l qo‘ygan bir qator shahar-tuman IIB boshliqlariga ogohlantirishlar berilgan. Andijon, Oltinko‘l hamda Buloqboshi tumanlari IIB boshliqlarining birinchi o‘rinbosarlari lavozimidan ozod etilgan. Bir qator kamchiliklarga yo‘l qo‘ygan IIO xodimlariga hayfsan intizomiy jazosi qo‘llanilgan.
Aniqlangan kamchiliklarni tez fursatda bartaraf etish bo‘yicha mutasaddilarga topshiriqlar berilib, ularning mas’uliyati oshirilgan.
