Jizzaxda bo‘ri bolalarini noqonuniy sotmoqchi bo‘lgan shaxslar jazolandi
Viloyat ekologiya va atrof-muhitni himoya qilish boshqarmasi ularga qanday chora ko‘rilganini ma’lum qildi.
Ijtimoiy tarmoqda Jizzax viloyati Baxmal tumanida bo‘ri bolachalarini noqonuniy tarzda sotayotgan shahslar haqida xabar tarqalgandi. Holat bo‘yicha viloyat ekologiya va atrof-muhitni himoya qilish boshqarmasi rasmiy munosabat bildirdi.
Aniqlanishicha, Baxmal tumani “O‘smat” SHFYda istiqomat qiluvchi T. X. va “Novqa” MFYda yashovchi J. M. ismli fuqarolar 3 dona bo‘ri bolalarini ushlab, ularni sotish maqsadida ijtimoiy tarmoq sahifalariga joylagan.
Olib borilgan tezkor nazorat reyd tadbirida fuqaro X. T. ga tegishli avtomashina yukxonasida bo‘lgan 3 dona bo‘ri bolalari daliliy ashyo sifatiga olingan. Huquqbuzarlaarga nisbatan Ma’muriy javobgarlik to‘g‘risidagi kodeksning 90-moddasi, 1-qismiga asosan bazaviy hisoblash miqdorining 9 barobari miqdorida, ya’ni 2430000 so‘mdan jarima qo‘llanilgan.
Ayni vaqtda bo‘ri bolalari ekoloklar tomonidan parvarish qilinmoqda. Ob-havoning qulay bo‘lgan vaqtida bo‘ri bolalari tabiat qo‘yniga qo‘yib yuboriladi.
