Surxondaryoda 500 mlnlik jinoyat fosh bo‘ldi
Aniqlanishicha, jarqo‘rg‘onlik fuqaro o‘ziga tegishli bo‘lmagan 50 sotix yerni boshqa shaxsga sotmoqchi bo‘lgan.
Jarqo‘rg‘onda 500 millionga noqonuniy yer sotilishining oldi olindi, deya xabar bermoqda Surxondaryo viloyati IIB axborot xizmati.
Ma’lum qilinishicha, Qumqo‘rg‘on tumanida yashovchi fuqaro B. S. viloyat IIBga ariza bilan murojaat qilgan. Shunga asosan joriy yilning 18-may kuni Termiz shahrining Alpomish mahallasidagi restoranda tezkor tadbir o‘tkazilgan. Unda Jarqo‘rg‘on tumanida yashovchi fuqaro X. I. o‘ziga tegishli bo‘lmagan 50 sotix yer maydonini jami 500 mln so‘mga sotishga kelishib, pulning 214 mln so‘mini olgan vaqtida ashyoviy dalillar bilan qo‘lga tushgan.
Mazkur holat yuzasidan X. I. ga nisbatan Jinoyat kodeksining 168-moddasi 4-qismi “a” bandi bilan jinoyat ishi qo‘zg‘atilgan.
Eslatib o‘tamiz, bundan oldin Samarqand viloyatida 3 gektar yerni 100 ming AQSH dollariga sotmoqchi bo‘lgan shaxslar ushlangandi. Shuningdek, Buxoro viloyatida fuqaro hokimlik zaxirasidagi yerni 8 ming dollarga pullamoqchi bo‘lgan.
Javohirbek TURSUNOV
