"Tolibon" Xitoy bilan yirik iqtisodiy loyihani muhokama qildi
Pekin ushbu loyihani 2007 yilda qo‘lga kiritgan.
Afg‘oniston tog‘-kon va neft sanoati vaziri v.b. Shahobiddin Dilovar Xitoy bilan Aynoq mis konini ishga tushirish masalasini muhokama qildi.
Xitoy tomondan muzokarada Pekinning Kobuldagi elchisining o‘rinbosari Den Yanan ishtirok etgan. Dilovar konning tez orada ishga tushirilishi zarurligini taʼkidlagan. U Afg‘oniston va Xitoy o‘rtasida chuqur tarixiy va iqtisodiy aloqalar mavjudligini qayd etgan.
Maʼlumot o‘rnida: 2007 yilda Xitoy kompaniyasi Aynoq koni bo‘yicha o‘tkazilgan tenderda g‘olib bo‘lgan. Loyihaning umumiy qiymati 3 milliard dollarni tashkil etadi. Aynoq Kobuldan 35 kilometr uzoqlikda joylashgan bo‘lib, mis rudasi zahiralari bo‘yicha dunyoda ikkinchi o‘rinda turadi (11 million tonna). Ammo keyinchalik konni o‘zlashtirish ishlari xavfsizlik sohasidagi muammolar tufayli to‘xtatib qo‘yilgan.
Avvalroq Hindiston delegatsiyasi "Tolibon" bilan muzokara o‘tkazgani to‘g‘risida xabar berilgandi.
