Ukrainadagi vaziyat YеIni parchalashi mumkin — Bloomberg
Mojaro Yevropadagi integratsiya jarayonlarining kamchiliklarini ko‘rsatib bergani qayd etilgan.
Ukrainadagi vaziyat Yevropa Ittifoqining siyosiy va iqtisodiy parchalanishiga olib kelishi mumkin. Bu haqda amerikalik tahlilchi Klayv Kruk Bloomberg agentligiga yozgan maqolasida taxmin qildi.
“Hozircha Yevropa bosimi ostidagi yangi birlikdan xursand bo‘lishga hali erta. Ittifoqqa qo‘yilayotgan talablar uni yo kuchaytiradi, yo parchalanishiga olib keladi”, – degan ekspert.
Kruk YIning Rossiya-Ukraina mojarosiga munosabati ko‘pchilikni hayron qoldirganini qayd etdi. Bu Rossiyaga qarshi sanksiyalarda, Ukrainaga qurol yetkazib berishda, shuningdek, mudofaaga xarajatlarning oshirilishida hamda Shvetsiya va Finlyandiyaning NATOga aʼzolikka intilishida yaqqol namoyon bo‘ldi.
“Shu bilan birga bu kabi choralarni mustahkamlash Yevroittifoqdan odatdagidan kuchli siyosiy birlik talab qiladi”, – deb taʼkidlagan u.
Muallifning fikricha, Yevropa davlatlarida kuzatilayotgan turli darajadagi inflyatsiya iqtisodiy integratsiya masalasida hali ko‘p ishlar qilinishi kerakligini ko‘rsatadi. Bu ayniqsa, energetika sohasiga taalluqli. Bundan tashqari, xavfsizlikka yangicha yondashuv zarur.
“Rossiya-Ukraina nizosi YEIdan birlashishni talab qildi. Ammo RFga qarshi sanksiyalar Yevropaga yana-da kuchli zarba beradi. Ayrim davlatlarga zarba boshqalariga qaraganda sezilarli bo‘ladi”, – deb fikriga yakun yasagan Kruk.
Avvalroq Yaponiya Rossiyaga qarshi yangi sanksiyalar joriy etgandi.
