Bred Pitt sobiq rafiqasi Anjelina Jolini sudga bermoqchi
U Jolini Pittga tegishli bo‘lgan vinochilik biznesiga zarar yetkazishda ayblamoqda.
Ma’lum bo‘lishicha, sobiq juftlik o‘z vaqtida Fransiyaning janubiy qismida joylashgan ulkan uzumzorga egalik qilishgan. Bu yerda yetishtirilgan uzumdan “Miraval” vinosi ishlab chiqarilgan.
Pitt va Joli uni sotib olgan vaqtlarida uzumzordagi o‘z ulushlarini bir-birlarining roziligisiz sotmaslikka kelishib olgan. Ajrim qaroridan keyin Anjelina Joli kompaniyadagi o‘z ulushini sobiq turmush o‘rtog‘idan yashirincha rossiyalik milliarder Yuriy Sheflerga tegishli bo‘lgan kompaniyaga sotib yuborgan.
Pittning vakillari rossiyalik tadbirkor vinochilik kompaniyasining ustidan nazorat o‘rnatishga harakat qilayotgani, bu esa Pitt tomonidan yaratilgan brendning nufuziga salbiy ta’sir ko‘rsatayotganini aytmoqda.
Aktyor sobiq rafiqasini sudga berib, u bilan rossiyalik tadbirkor o‘rtasidagi kelishuvning hech qanday kuchga ega emasligini isbotlamoqchi. Pitt shuningdek, yetkazilgan zarar uchun aktrisadan badal undirishni ham reja qilgan.
