Buxoroda 2 nafar fuqaroni Janubiy Koreyaga ishga yuborish uchun salkam 10 ming dollar so‘ragan firibgar ushlandi
Hozirda mazkur holat yuzasidan jinoyat ishi qo‘zg‘atilgan.
Navbahor tumani va Buxoro shahrida ishga qabul qilish va xorijiy davlatga ishga yuborishni va’da qilgan firibgarlar ushlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Xabarda aytilishicha, Departament hamda DXXning Navoiy viloyati boshqarmalari tomonidan tezkor tadbir o‘tkazilgan. Unda Navbahor tuman Tibbiyot birlashmasi kadrlar bo‘limi boshlig‘i X. M. fuqaro Sh. ni ushbu birlashmaga feldsher vazifasiga ishga kiritib qo‘yishi evaziga 7 mln so‘mni firibgarlik yo‘li bilan olgan vaqtida ashyoviy dalillar bilan qo‘lga tushgan.
Shuningdek, Departament, DXX hamda IIBning Buxoro viloyati boshqarmalari tomonidan o‘tkazilgan tezkor tadbirda Buxoro shahrida yashovchi fuqaro U. E. boshqa bir fuqaro D. ning ishonchiga kirib, o‘zi va singlisini tanishlari yordamida Janubiy Koreya davlatiga ishga yuborish masalasini 9,6 ming AQSH dollariga kelishib, shundan 600 AQSH dollari va 1 mln so‘mni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
