Samarqanddagi savdo do‘konlarida yana yong‘in chiqdi
Joriy haftada viloyatda ketma-ket 3 ta yong‘in sodir bo‘ldi.
Bugun, 9-iyun kuni Samarqand viloyatining Oqdaryo tumanidagi savdo do‘konlarida yong‘in yuz berdi. Bu haqda FVV axborot xizmati ma'lum qildi.
Qayd etilishicha, Oqdaryo tumani “Loyish” MFY A. Temur shohko‘chasida joylashgan savdo do‘konlarida yong‘in sodir bo‘layotganligi to‘g‘risida soat 03:50 da tuman FVBga xabar kelib tushgan.
Shunga ko‘ra, 7 ta yong‘in-qutqaruv guruhi va bitta yordamchi avtomashina (kamaz) soat 03:56 da voqea joyiga yetib borib, soat 04:45 da bino qurshab olingan va soat 05:37 da yong‘in bartaraf etilgan.
Hodisa oqibatida tan jarohati olgan va halok bo‘lganlar yo‘q. Dastlabki ma’lumotlarga ko‘ra, yong‘in natijasida mebel, xo‘jalik mollari va oziq-ovqat do‘konlarining taxminan 200 kvadrat metr maydonida shift, tom va jihozlar yonib zararlangan.
“Hozirda yong‘inning kelib chiqish sababi va moddiy zarar miqdori aniqlanmoqda”, — deyiladi xabarda.
Eslatib o‘tamiz, joriy haftada Samarqand viloyatida yong‘in bilan bog‘liq ketma-ket 3 ta holat qayd etildi. Xususan, 7-iyun kuni Samarqand shahridagi 2 ta MCHJ binosida, 8-iyun kuni Oqdaryo tumanidagi “Qang‘li” qabristonida yong‘in chiqqandi. Bundan tashqari, 5-iyun kuni Narpay tumanidagi dehqon bozorida ham yirik yong‘in sodir bo‘lgan.
Javohirbek TURSUNOV
