Surxondaryoda YPX xodimini haqoratlab, uning qarindoshlariga tuhmat qilgan haydovchi qo‘lga olindi
Fuqaro o‘z qilmishidan pushaymon ekanini aytib, xodimning oila a’zolaridan uzr so‘ragan.
Surxondaryo viloyatining Denov tumanida YPX inspektorini haqorat qilib, buni ijtimoiy tarmoqlar orqali tarqatgan fuqaro qo‘lga olindi. Mazkur holat yuzasidan viloyat IIB YHXB rasmiy munosabat birdirdi.
Ma’lum qilinishicha, voqea joriy yilning 6-iyun kuni M-41 xalqaro avtomobil yo‘lining Surxondaryo viloyati Denov tumani Lochin mahallasi hududidan o‘tgan qismida sodir bo‘lgan. Neksiya haydovchisi N. mazkur yo‘nalishda Kobalt rusumli avtomashinada xizmat olib borayotgan xodim J. ni har xil uyatli so‘zlar bilan haqorat qilib, uning yaqin qarindoshlari nomiga tuhmat qilgan va holatni o‘zining mobil telefoni orqali tasvirga olib, ijtimoy tarmoqlarga tarqatgan. Shundan so‘ng u IIB organlaridan yashiringan.
Surxondaryo viloyati IIB JXX YHXB va Denov tumani IIB xodimlari tomonidan olib borilgan tezkor qidiruv natijasida haydovchi Denov tumani hududida ushlangan.
“Nimagadir kallam o‘zimda emas edi. Ichganim yo‘q, chekkanim yo‘q. O‘zim bilmagan holda videoni ijtimoiy tarmoqqa tarqatdim”, — deydi haydovchi.
Dastlabki tergovga qadar tekshiruv harakatlari olib borilganda, fuqaro muqaddam sud tomonidan Jinoyat kodeksining 122-moddasi bilan aybli deb topilib, voyaga yetmagan farzandlarini moddiy ta’minlashdan bo‘yin tovlab, ijro organlaridan yashirinib yurgani aniqlangan.
Navbatdagi harakatida Jinoyat kodeksining 140-moddasi 3-qismida nazarda tutilgan holatlar (ichki ishlar organi xodimiga nisbatan qo‘pol munosabatda bo‘lgani, sha’ni va qadr-qimmatini beodoblik bilan qasddan tahqirlash, OAVda, telekommunikatsiya tarmoqlarida yoki internet jahon axborot tarmog‘ida joylashtirish orqali haqorat qilish) borligi aniqlanib, kelgusida qonuniy to‘xtamga kelish uchun Denov tumani prokuraturasiga taqdim etilgan.
