Bojxona instituti xodimi 6 ming dollar pora bilan qo‘lga tushdi
U sirdaryolik fuqaroni O‘zbekiston davlat jismoniy tarbiya va sport universitetiga o‘qishga kiritib qo‘ymoqchi bo‘lgan.
Sirdaryo va Farg‘ona viloyatlarida OTMga o‘qishga kiritish bilan bog‘liq noqonuniy holatlar aniqlandi.
O‘zbekiston Respublikasi Davlat bojxona qo‘mitasining Bojxona instituti xodimi E. Z. Sirdaryo viloyatining Sardoba tumanida yashovchi fuqaroning ishonchiga kirib, joriy yil uchun mazkur oliy ta’lim muassasasiga qabul tugaganligini aytib, uning o‘g‘lini O‘zbekiston davlat jismoniy tarbiya va sport universitetiga o‘qishga kiritib qo‘yish evaziga 6 ming AQSH dollari talab qiladi.
Ammo u so‘ralgan pulni olgan vaqtida DXXning Sirdaryo viloyati bo‘yicha boshqarmasi hamda Iqtisodiy jinoyatlarga qarshi kurashish departamentining hududiy boshqarmasi xodimlari tomonidan ashyoviy dalillar bilan ushlangan.
Bu yo‘nalishda DXXning Farg‘ona viloyati bo‘yicha boshqarmasi xodimlari ham IJQK departamenti xodimlari bilan hamkorlikda tezkor tadbir o‘tkazgan.
Bag‘dod tumanida yashovchi, 1999 yilda tug‘ilgan I. L. mazkur tumanda istiqomat qiluvchi ayolning qizini Toshkent tibbiyot akademiyasiga o‘qishga kiritib qo‘yish evaziga 10 ming AQSH dollari olgan vaqtida ushlangan.
Dastlabki surishtiruv harakatlari davomida u ushbu pul mablag‘ini Toshkent shahrida yashovchi, 1997 yilda Qashqadaryo viloyatining Gʻuzor tumanida tug‘ilgan Q. S. ga olib borib berishi kerakligi ma’lum bo‘lib, tezkor tadbir Toshkent shahrida davom ettirilgan hamda u ham pulni olgan vaqtida qo‘lga tushgan.
Hozirda har ikki holat yuzasidan qonunbuzarlarga nisbatan jinoyat ishlari qo‘zg‘atilib, tergov harakatlari olib borilmoqda.
