Samarqandda Zil avtomobili yonib ketdi
Bu joriy haftada viloyatda ro‘y bergan 4-yong‘in.
Kecha, 9-iyun kuni Samarqand viloyatining Urgut tumanida “Zil” avtomashinasi yonib ketdi. Bu haqda viloyat Favqulodda vaziyatlar boshqarmasi Matbuot xizmati ma’lum qildi.
Xabarda aytilishicha, shu kuni soat 10:02 da “Guliston” MFY Uvaysiy ko‘chasida Jizzax viloyati Zomin tumanida yashovchi fuqaro X. J. boshqaruvidagi “Zil” rusumli yuk avtomashinasi va unga yuklangan somon toylarida yong‘in sodir bo‘layotganligi to‘g‘risida tuman FVBga xabar kelib tushgan.
Shunga ko‘ra, 2 ta yong‘in-qutqaruv ekipaji voqea joyiga soat 10:11 da yetib borib, yong‘in soat 10:15 da qurshab olingan va soat 10:50 da bartaraf etilgan.
Hodisa oqibatida tan jarohati olgan va halok bo‘lganlar yo‘q. Hozirda tergovga qadar tekshiriv ishlari olib borilmoqda.
Eslatib o‘tamiz, joriy haftada Samarqand viloyatida yong‘in bilan bog‘liq ketma-ket 4 ta holat qayd etildi. Xususan, 7-iyun kuni Samarqand shahridagi 2 ta MCHJ binosida, 8-iyun kuni Oqdaryo tumanidagi “Qang‘li” qabristonida va 9-iyun kuni xuddi shu tumandagi savdo do‘konlarida yong‘in chiqqandi. Bundan tashqari, 5-iyun kuni Narpay tumanidagi dehqon bozorida ham yirik yong‘in sodir bo‘lgan.
Javohirbek TURSUNOV
