Amerika kompaniyasi “Roskosmos”ga to‘lovni rublda amalga oshirdi
Bunga to‘lovning kechiktirilishi sabab bo‘lgan.
“Roskosmos” Amerikaning “Axiom Space” kompaniyasidan “NASA” astronavti Mark Vande Xeyning Rossiyaning “Soyuz” kosmik kemasida parvozi uchun rublda to‘lov oldi. Bu haqda davlat korporasiyasi rahbari Dmitriy Rogozin ma’lum qildi.
“Biz to‘liq mablag‘ni “NASA”dan emas, aniqrog‘i, ushbu missiyani tashkil etishda vositachi bo‘lgan “Axiom”dan oldik”, — dedi Rogozin.
Uning so‘zlariga ko‘ra, Amerika kompaniyasi to‘lovni bir oyga kechiktirgan. 14-aprel kuni Rogozin Amerikaning “Axiom Space” kompaniyasi logistika muammolari tufayli “NASA” astronavti Van De Xeyning parvozi uchun “Roskosmos”ga to‘lovni o‘tkaza olmagani haqida xabar bergandi.
23-mart kuni Rogozin davlat korporasiyasi xalqaro shartnomalarni rublda tuzishni rejalashtirayotganini e’lon qilgan.
