Rossiyada sudlanganlarning taksichilik qilishi taqiqlandi
Yangi qonun 2023-yil 1-martdan kuchga kiradi.
Rossiya Prezidenti Vladimir Putin sudlanganlik holati bo‘lgan shaxslarning taksi va jamoat transportida ishlashini taqiqlashni nazarda tutuvchi qonunni imzoladi. Bu haqda “Sputnik” nashri xabar bermoqda.
Xabarda aytilishicha, hujjat 11-iyun kuni rasmiy huquqiy axborotlar portalida chop qilingan. Unga ko‘ra, taksida quyidagi jinoyatlar uchun sudlanganlik holati tugallanmagan bo‘lsa, ishlash taqiqlanadi: qotillik, qasddan badanga og‘ir shikast yetkazish, odam o‘g‘irlash, talonchilik, bosqinchilik, jinsiy daxlsizlik va shaxsning jinsiy erkinligiga qarshi, jamiyat xavfsizligiga qarshi, konstitusiyaviy tuzim va davlat xavfsizligiga qarshi, insoniyat tinchligi va xavfsizligiga qarshi jinoyatlar. Yevroosiyo iqtisodiy ittifoqi mamlakatlarida – Armaniston, Belarus, Qozog‘iston va Qirg‘izistonda ham sodir etilgan jinoyatlar inobatga olinadi.
Quyidagi moddalar bo‘yicha sudlanganlik holati tugallanmagan yoki olib tashlanmaganlar avtobus, tramvay va trolleybus haydovchilari bo‘la olishmaydi: jamiyat xavfsizligiga qarshi, konstitusiyaviy tuzim va davlat xavfsizligiga qarshi, insoniyat tinchligi va xavfsizligiga qarshi jinoyatlar.
Qonun 2023 yil 1 martdan kuchga kiradi.
Rossiya qonunchiligiga binoan, og‘ir jinoyatlar uchun sudlanganlik jazo muddati o‘talgandan so‘ng sakkiz yil o‘tib, o‘ta og‘ir jinoyatlar uchun esa 10 yil o‘tib tugallanadi. Bu haqda sudning tegishli qarori qabul qilinadi.
