Samarqandda soxta IIB xodimi qo‘lga tushdi
25 yoshli yigit qalbaki guvohnoma yasab olib, o‘zini ichki ishlar xodimi deb tanishtirib yurgan.
Joriy yilining 2 iyun kuni Samarqand viloyatining Urgut tumanida joylashgan “Omonqo‘ton” yo‘l patrul xizmati maskanida soxta ichki ishlar xodimi qo‘lga olindi. Bu haqda viloyat IIB axborot xizmati xabar berdi.
Qayd etilishicha, O‘zbekiston Respublikasi IIV Shaxsiy xavfsizlik bosh boshqarmasi Samarqand viloyati bo‘yicha boshqarmasi xodimlari tomonidan olingan ma’lumotlarga asosan tezkor tadbir o‘tkazilgan. Tadbir davomida Kobalt rusumli avtomashina to‘xtatilganida, Qashqadaryo viloyati Shahrisabz tumanida yashovchi shaxs IIO xizmat kiyimida tushgan fotosurati mavjud bo‘lgan soxta xizmat guvohnomasini YPX insektorlariga taqdim etgan vaqtida ushlangan. Shundan so‘ng uning xizmat guvohnomasi ashyoviy dalil sifatida rasmiylashtirib olingan.
Hozirda mazkur holat yuzasidan tergovga qadar tekshiruv harakatlari olib borilmoqda.
