Fransiyada parlament saylovida rekord darajada kam saylovchi qatnashdi
Saylovning ikkinchi bosqichi 19 iyunda bo‘lib o‘tadi.
Yakshanba kuni Fransiyada parlament saylovlarining birinchi bosqichi bo‘lib o‘tdi.
Mamlakat ichki ishlar vazirligi maʼlumotlariga ko‘ra, mahalliy vaqt bilan soat 17:00 da saylovchilarning 39.42 foizi ovoz bergan. Bu 2017 yilgi parlament saylovlarining birinchi bosqichiga nisbatan past ko‘rsatkich (o‘shanda 40.75 foiz ko‘rsatkich qayd etilgan).
Fransiyada jami 48.7 million fuqaro ovoz berish huquqiga ega. Ular Milliy majlis (parlamentning quyi palatasi) 577 deputatini saylashi kerak.
Birinchi bosqichda g‘alaba qozonish uchun saylovchilarning 50 foizdan ortig‘ini olishi talab etiladi. Ikkinchi turda 12.5 foizdan baland ovoz to‘plagan nomzodlar ishtirok eta oladi. U 19 iyun kuni o‘tkaziladi.
Hozirda ikki alyans alohida ajralib turibdi. Ulardan biri — Jan-Lyuk Melanshon boshchiligidagi “Bo‘ysunmas Fransiya” o‘ta so‘l partiyasi boshchiligidagi koalitsiya hisoblanib, u Yashillar, Sotsialistik va Kommunistik partiya bilan “Yangi xalq ekologik va sotsial ittifoqi deb ataladi. U parlamentda ko‘pchilikni egallashga harakat qilmoqda, bu Melanshonga bosh vazir lavozimini egallashga imkon beradi.
