AQSH Ukrainaga yetkazib berilgan yordam “noto‘g‘ri qo‘llar”ga tushishi mumkinligidan xavotirda
Bir qator amaldorlar buning ehtimoli yuqori ekanini maʼlum qilgan.
AQSH va NATOning zarur nazoratisiz Ukrainaga yetkazib berilayotgan yordam noto‘g‘ri maqsadlarda ishlatishi mumkin. Bu haqda The Wall Street Journal gazetasi sobiq va amaldagi AQSH oliy martabali amaldorlariga tayanib xabar berdi.
Xususan, Afg‘onistonni tiklash masalasi bo‘yicha AQSH hukumati bosh inspektori Jon Sopko “o‘g‘riliklar muqarrar”ligi to‘g‘risida gapirgan.
“Noto‘g‘ri foydalanish va yon bosishlardan qochib-qutulish mumkin emas. Ahmoqona qarorlar bo‘lishi aniq. Oradan ikki yil o‘tib biz o‘g‘rilik va suisteʼmolliklar haqida xabar topamiz”, – degan Sopko.
Pentagon sobiq xodimi Mark Kensianning so‘zlariga ko‘ra, Ukraina harbiy mojarogacha korrupsiya masalasida tanqidlarga uchragan va bu illat hamon yo‘qolgani yo‘q.
“Agar Ukraina oligarxlari Amerika soliq to‘lovchilari hisobiga yaxtalarda suzsa, bu AQSH qonun chiqaruvchi hokimiyati uchun katta zarba bo‘ladi”, – deb taʼkidlagan u.
Shu bilan birga gazeta maʼlumotlariga ko‘ra, hozircha Kiyev tomonidan G‘arb ko‘rsatgan yordamdan noto‘g‘ri foydalanish holatlari kuzatilmagan. Ammo NATO va Vashington tomonidan uning taqsimoti to‘g‘ri nazorat qilinmas ekan, “buning sodir bo‘lishi faqat vaqt masalasiga aylanadi”.
Avvalroq Interpol Ukrainaga yetkazib berilayotgan qurollar qora bozorga o‘tishi xavfi borligini maʼlum qilgandi.
