Janubiy Koreya, AQSH va Yaponiya harbiylari harbiy mashg‘ulotlarni keskin ko‘paytirmoqchi
KXDR raketa sinovlari bunga sabab bo‘lgan.
Janubiy Koreya, AQSH va Yaponiya harbiylari Gavayi orollarida harbiy mashg‘ulot o‘tkazmoqchi. Bu haqda Yonhap agentligi xabar berdi.
Unga ko‘ra, Pacific Dragon mashg‘ulotlari 1-14 avgust kunlari o‘tkazilishi belgilangan. Vashington, Seul va Tokio KXDR raketa sinovlari fonida xavfsizlik sohasidagi hamkorlikni kuchaytirmoqchi.
O‘tgan haftada uch davlat mudofaa vazirlari Singapurda uchrashgan hamda harbiy mashg‘ulotlarni doimiy ravishda o‘tkazib borishga kelishib olgan. Bundan tashqari, bu yilgi o‘quv mashqlarida Kanada va Avstraliya ham ishtirok etishi mumkin.
Yilning ikkinchi yarmida Janubiy Koreya, AQSH va Yaponiya raketa uchirilishidan ogohlantiruvchi tizimlarni ham sinovdan o‘tkazadi. Shuningdek, 29 iyundan 4 avgustgacha uch davlat harbiy kemalari RIMPAC (Rim of the Pacific — Tinch okeani doirasi) mashg‘ulotlarini o‘tkazadi.
Avvalroq Janubiy Koreya prezidenti Yun Sok Yol KXDRga qatʼiy javob berishga tayyorligini aytgandi.
