Samarqandda bir kun ichida 2 ta yong‘in sodir bo‘ldi
Holat yuzasidan viloyat FVB ma’lumot berdi.
Bugun, 14 iyun kuni Samarqand viloyatining Pastdarg‘om va Kattaqo‘rg‘on tumanlarida tirkamaga ortilgan somonlarning yonishi bilan bog‘liq ikkita holat kuzatildi. Bu bo‘yicha viloyat Favqulodda vaziyatlar boshqarmasi Matbuot xizmati xabar berdi.
Ma’lum qilinishicha, soat 13:07 larda “101” qisqa raqami orqali Pastdarg‘om tumani “Olti Qahramon” MFYda traktor tirkamasiga yuklangan somon o‘ramlarida yong‘in sodir bo‘lganligi to‘g‘risida ma’lumot kelib tushgan. Voqea joyiga 1 ta yong‘in-qutqaruv ekipaji jalb etilgan va soat 13:44 da yong‘in to‘liq o‘chirilgan. Hodisa oqibatida 100 ga yaqin somon o‘rami yonib zararlangan.
Shuningdek, soat 13:11 da Kattaqo‘rg‘on tumani “Navbahor” MFYda traktorning 2 ta tirkamasiga yuklangan somonda yong‘in sodir bo‘layotganligi to‘g‘risida ma’lumot qabul qilingan. Voqea joyiga 2 ta yong‘in-qutqaruv ekipaji yuborilgan va soat 13:50 da yong‘in to‘liq bartaraf etilgan. Hodisa oqibatida taxminan 400 kg somon yonib zararlangan.
