Olmaliq shahrida kuchli portlash sodir bo‘ldi
Holat bo‘yicha FVV ma’lumot berdi.
Bugun, 15-iyun kuni Toshkent viloyatining Olmaliq shahrida joylashgan korxona binosida portlash sodir bo‘ldi. Bu haqda Favqulodda vaziyatlar vazirligi Matbuot xizmati xabar berdi.
Ma’lum qilinishicha, voqea soat 17:55 da Olmaliq shahridagi “Ammafos-Maksam” korxonasi hududida ijarada faoliyat yuritayotgan “MAXAM-UZBEKISTON” qo‘shma korxonasining Reaxit ishlab chiqarish sexida yuz bergan. Hodisaga texnologik jarayonning buzilishi sabab bo‘lgan.
Dastlabki ma’lumotlarga ko‘ra, portlash oqibatida ushbu sexning bino konstruksiyalari buzilgan. Shuningdek, voqea joyiga yaqin bo‘lgan yuk mashinasi haydovchisi tan jarohati olgan.
“Ayni vaqtda jabrlangan fuqaro shahar tibbiyot birlashmasida, shifokorlar nazoratida, ahvoli qoniqarli. Sodir bo‘lgan vaziyat oqibatida ishchi-xodimlarning halok bo‘lish holatlari qayd etilmadi”— deyiladi xabarda.
Voqea joyiga Favqulodda vaziyatlar vaziri boshchiligida viloyat hokimligi, prokuratura, IIV, Milliy Gvardiya va boshqa tashkilotlar vakillari yetib borgan. Hozirda vaziyat oqibatlarini bartaraf etish ishlari amalga oshirilmoqda.
