O‘zbekiston jamoasi Yaponiyani mag‘lub etdi
O‘yin 2:0 hisobida g‘alaba bilan yakunlandi.
Bugun, 15 iyun kuni “Bunyodkor” stadionida 23 yoshgacha bo‘lgan futbolchilar o‘rtasidagi Osiyo Kubogining ikkinchi yarim finali bo‘lib o‘tdi. Unda O‘zbekiston Olimpiya terma jamoasi yaponiyalik tengqurlarini 2:0 hisobida mag‘lub etdi.
Dastlab Jasur Jaloliddinovning 60-daqiqada kiritgan goli hisobni ochib berdi. Ikkinchi taym so‘nggida Husain Norchayev birga-bir vaziyatdan unumli foydalanib, farqni ikkitaga yetkazdi.
Shu tariqa, o‘zbek olimpiyachilari final yo‘llanmasini qo‘lga kiritdi. Endi hal qiluvchi bahsda Kapadze shogirdlariga Saudiya Arabistoni raqiblik qiladi.
