Toshkentda avtobus avtohalokatga uchradi
Hodisaga haydovchining rul boshqaruvini yo‘qotishi sabab bo‘lgan.
Bugun, 15-iyun kuni Toshkent shahrining Chilonzor tumanida “Isuzu” rusumli avtobus yo‘l-transport hodisasiga uchradi. Holat yuzasidan Ichki ishlar vazirligi Jamoat xavfsizligi departamenti Yo‘l harakati xavfsizligi xizmati ma’lumot berdi.
Qayd etilishicha, hodisa soat 08:30 atrofida Chilonzor tumani Bunyodkor ko‘chasidagi Oliy Majlis binosi ro‘parasida sodir bo‘lgan. 1991 yilda tug‘ilgan haydovchi M. A. avtobus rul boshqaruvini yo‘qotib, yo‘l chetidagi metall yoritgich ustuniga borib urilgan.
“YTH oqibatida jarohat olganlar aniqlanmadi. Avtobusda yo‘lovchilar bo‘lmagan”, — deyiladi xabarda.
Hozirda mazkur holat yuzasidan Toshkent shahar IIBB YHXB xodimlari tomonidan surishtiruv ishlari olib borilmoqda.
