Ukraina xalqining jasorati dunyoni ilhomlantirmoqda—Bayden
AQSH Prezidenti Ukraina uchun yana 1 mlrd dollar ajratilishini ma’lum qildi.
AQSH prezidenti Jo Bayden Vladimir Zelenskiyga qo‘ng‘iroq qilib, Ukrainaga xavfsizlik uchun yana 1 milliard dollar yordam ko‘rsatilishini e’lon qildi. Bu haqda Oq uy matbuot xizmati ma’lum qildi.
Prezident Bayden AQSH Ukrainani qo‘shimcha artilleriya va qirg‘oq mudofaa qurollari, shuningdek, ilg‘or raketa tizimlari uchun o‘q-dorilar bilan ta’minlayotganini ham aytib o‘tgan.
Bundan tashqari, 225 million dollarlik gumanitar yordam paketi ajratildi. Mablag‘lar xavfsiz ichimlik suvi, zarur tibbiy buyumlar, shuningdek, ukrainaliklarni oziq-ovqat, uy-joy va asosiy ehtiyojlar uchun mablag‘ bilan ta’minlashga yo‘naltiriladi.
“Ukraina xalqining jasorati, chidamliligi va qat’iyati dunyoni ilhomlantirishda davom etmoqda. Qo‘shma Shtatlar ittifoqdoshlarimiz va hamkorlarimiz bilan o‘z ozodligi uchun kurashayotgan Ukraina xalqini qo‘llashda davom etadi”, — dedi Oq uy rahbari.
