“Bugun g‘alaba qozonib, butun xalqimizni xursand qilmoqchi edik. Biroq bu ishni uddalay olmadik. Buning uchun uzr so‘rayman”
Timur Kapadze matbuot anjumanida ishtirok etib, o‘yin haqida o‘z fikrlarini bildirdi.
Bugun, 19-iyun kuni “Bunyodkor” stadionida O‘zbekiston mezbonlik qilayotgan 23 yoshgacha bo‘lgan futbolchilar o‘rtasidagi Osiyo Kubogining final uchrashuvi bo‘lib o‘tdi. Unda saudiyaliklar O‘zbekiston ustidan 2:0 hisobida g‘alaba qozondi. Uchrashuvdan keyin Timur Kapadze matbuot anjumanida ishtirok etib, jurnalistlarning savollariga javob berdi.
O‘yin haqida
“Bugun g‘alaba qozonib, butun xalqimizni xursand qilmoqchi edik. Biroq bu ishni uddalay olmadik. Buning uchun uzr so‘rayman. Nasib emas ekan. Barcha muxlislarimizga rahmat aytamiz. Keyingi turnirlarda yaxshiroq natija qayd etishga harakat qilamiz”.
Bo‘riyevning o‘yin davomidagi harakatlari
“U o‘yin davomida yaxshi harakat qildi. Bugun o‘yin qiyin bo‘ldi. Afsuski, mag‘lubiyatga uchradik. Bolalarga rahmat aytaman. Bu bizga katta maktab bo‘ldi, bu mag‘lubiyatdan keyin yanada kuchliroq bo‘lamiz deb umid qilaman”.
Charchoq haqida
“Albatta, bu turnirda hamma jamoada charchoq bor, ayniqsa, finalchilarda. Chunki uzoq yo‘l bosib o‘tiladi. Bugun bolalar borini berib harakat qilishdi.
Bizning bu jamoani tashkil qilganimizda asosiy maqsad – Olimpiada. Biz bu turnirda yoshroq futbolchilar bilan ishtirok etgan bo‘lsak ham, yaxshi natija qayd eta oldik, deb o‘ylayman. Bu turnir futbolchilarni ham ruhan, ham jismonan ko‘rib oldik. Bolalar zo‘r o‘ynadi, men ulardan faxrlanaman. Qaysidir o‘yinda, qaysidir futbolchi yaxshiroq o‘ynadi, qaysidirida esa boshqasi. Aytishim kerak, hali yanada o‘sishimiz kerak.
Futbol shunday narsa – uzoq dam ololmaysiz. O‘yin tugagandan keyin u tarixga kiradi. Siz keyingi o‘yinga tayyorgarlik ko‘rishingiz kerak. To‘g‘ri, futbolchilarimda ruhiy va jismoniy tomonlama biroz toliqish bor. Lekin hayot davom etadi”.
