Nur-Sulton Rossiyaga qarshi iqtisodiy sanksiyalarga qo‘shildimi?
OAVda Rossiyaning 1700 vagon ko‘miri Qozog‘iston hududida to‘xtatib qo‘yilgani haqida xabarlar tarqalgan.
Qozog‘iston sanoat va infratuzilma taraqqiyoti vazirligi bu xabarlarni inkor etdi.
“Sanoat va infratuzilma taraqqiyoti vazirligi transport qo‘mitasi rasman maʼlum qiladiki, ushbu xabarlar feyk hisoblanadi”,– deyiladi vazirlik bayonotida.
Vazirlik aslida mamlakat hududida hech qanday 1700 vagon ko‘mir yo‘qligini maʼlum qilgan. Shu bilan birga temiryo‘l liniyalarida hech qanday ko‘mir ortilgan vagonlar mavjud emas.
“Temiryo‘llarda hech qanday uzilishlar yo‘q — eksport va import odatdagi tartibda amalga oshirilmoqda”, – deb qayd etilgan bayonotda.
Sanoat va infratuzilma taraqqiyoti vazirligi bu feyk maʼlumotlarni ikki davlatning hamkorlik aloqalarini buzishga qaratilganini taʼkidlagan.
Avvalroq Qosim-Jo‘mart To‘qayevning Rossiya ordenini olishdan bosh tortgani to‘g‘risida xabarlar tarqalgandi. Ammo bu keyinchalik Kreml tomonidan inkor etildi.
