Samarqandda yana savdo do‘koni yonib ketdi
Hodisaga elektr simlarining qisqa tutashuvi sabab bo‘lgan, deb taxmin qilinmoqda.
Bugun, 20-iyun kuni Samarqand shahrida fuqaroga tegishli savdo do‘koni va omborxonada yong‘in yuz berdi. Bu haqda viloyat Favqulodda vaziyatlar boshqarmasi Matbuot xizmati xabar berdi.
Qayd etilishicha, bugun soat 19:25 da Samarqand shahri “Bog‘isaroy” MFY Spitamin shohko‘chasi 68-uyda joylashgan “Saidabegim” oilaviy korxonasiga qarashli omborxona va savdo do‘konida yong‘in sodir bo‘layotganligi to‘g‘risida viloyat FVB xabar kelib tushgan.
Voqea joyiga yong‘in-qutqaruv ekipaji soat 19:28 da yetib borgan va yong‘in soat 20:35 da to‘liq o‘chirilgan. Uni bartaraf etishga 6 ta yong‘in-qutqaruv ekipaji va 2 ta maxsus suv tashish texnikasi jalb etilgan.
Dastlabki ma’lumotlarga ko‘ra, omborxona va savdo do‘konining taxminan 210 kvdrat metr maydonida shift, tom qismi va omborxona ichidagi paxta toylari yonib zararlangan. 350 kvadrat metr maydon yong‘indan saqlab qolingan.
“Hodisa oqibatida tan jarohati olgan va halok bo‘lganlar yo‘q. Yong‘in taxminan elektr simlarining qisqa tutashuvidan sodir bo‘lgan”, — deyiladi xabarda.
Hozirda yong‘indan keltirilgan moddiy zarar miqdori aniqlanmoqda.
Eslatib o‘tamiz, bundan oldin Samarqand viloyatining Oqdaryo tumanidagi savdo do‘konlarida yong‘in yuz bergandi. Bundan tashqari, 5-iyun kuni Narpay tumanidagi dehqon bozorida ham yirik yong‘in sodir bo‘lgan.
