Bayden yoqilg‘i solig‘ini bekor qilishi mumkin
Bu chora AQSHda benzin narxini barqarorlashtirish uchun amalga oshiriladi
Jozef Bayden federal yoqilg‘i solig‘ini vaqtinchalik bekor qilishi mumkin. Bu haqda The Wall Street Journal gazetasi xabar berdi.
Nashr maʼlumotlariga ko‘ra, Amerika yetakchisi va uning maslahatchilari bu masalani bir necha oydan buyon muhokama qilyapti. Chorshanba kuni prezident mamlakatda benzin narxi bo‘yicha vaziyat yuzasidan chiqish qilishi kutilmoqda.
Shu bilan birga har bir gallon (3.785 litr)benzindan 18.4 sent soliq undirilishini bekor qilish uchun Kongress roziligi talab etiladi. Shu sababli ko‘pchilik kuzatuvchilar bu qarorning ramziy ahamiyatga egaligini taʼkidlagan.
Gazetaning yozishicha, Kongressdagi ham demokratlar, ham respublikachilarning aksariyati yoqilg‘i solig‘i bekor qilinishiga qarshi. Ular bu kabi choralar narx barqarorlashuviga taʼsir o‘tkaza olishiga ishonmayapti.
Avvalroq AQSH senatori mamlakatda benzindan ko‘ra kokain sotib olish osonligini aytgandi.
