Termizda joylashgan logistika markaziga xalqaro xab maqomi berildi
Ushbu markaz Afg‘onistonga gumanitar yordam yetkazib berish bilan shug‘ullanadi.
Termizda joylashgan "Termez Cargo Centre"ga xalqaro transport xabi maqomi berildi. Bu haqda Prezidentning “Gumanitar yordam ko‘rsatish bo‘yicha Xalqaro ko‘p funksiyali transport-logistika xabini tashkil etish choralari to‘g‘risida”gi qarorida so‘z boradi.
Hujjatda taʼkidlanishicha, zamonaviy dunyoning asosiy muammolaridan biri Afg‘oniston va boshqa mamlakatlardagi gumanitar vaziyatni barqarorlashtirish hisoblanadi.
Xalqaro xabni tashkil etishdan ko‘zlangan maqsad — BMT va boshqa xalqaro tashkilotlarning Afg‘onistonga ko‘rsatayotgan gumanitar yordamini markazlashtirilgan tarzda yetkazib berishni taʼminlashdan iborat.
Termez Cargo Centre insonparvarlik ko‘magini qabul qilish, saqlash va jo‘natish bilan shug‘ullanadi. Yetkazib berish havo, temiryo‘l va avtomobil transporti orqali amalga oshirilmoqda.
Xabda kompleks transport-logistik xizmatlarni ko‘rsatishni tashkil etish rejalashtirmoqda.
Avvalroq Og‘ir gumanitar vaziyat tufayli Jahon banki Afg‘onistondagi qator loyihalarini qayta tiklagandi.
