“Qo‘yliq” bozori buzilmaydi—hokimlik

 

Ijtimoiy tarmoqda “Qo‘yliq” bozorini shahar ehtiyojlari uchun olib qo‘yish masalasi keng muhokamalarga sabab bo‘ldi. Holatga Toshkent shahar hokimligi rasmiy munosabat bildirdi.

Ma’lum qilinishicha, “Qo‘yliq” dehkon bozorining to‘liq hududi davlat va jamiyat ehtiyojlari uchun olib qo‘yish ko‘zda tutilmagan. Asosiy kirish joyi oldidagi avtoturargoh hududining bir qismi va bir nechta vaqtincha savdo qurilmalarining o‘rni qurilish jarayoniga jalb etiladi. Bunda, asosiy bino va savdo rastalarining aksariyati o‘z joyida qoladi. Loyihaga ko‘ra, jalb etiladigan hududning umumiy maydoni 10 ming kvadrat metr atrofida bo‘ladi.

“Qo‘yliq” buyum bozori ham to‘liq olib qo‘yilmaydi. Bu yerda ham avtoturargoh hududi va bir nechta vaqtincha qurilmalarning o‘rni ishlarga jalb etilib, ular uchun kompensasiya mablag‘lari to‘lab beriladi. Buyum bozorining ham asosiy paviloni o‘z joyida qoladi. Avtoturargoh hududi bilan birga ishlarga jalb etiladigan umumiy maydon 6,3 ming kvadrat metrni tashkil etadi.

Ishlar yakunidan so‘ng bozorlarning avtoturargohi xavfsizlik talablarini hisobga olgan holda tegishli ruxsatnoma bo‘lsa, ko‘prik va yondosh yo‘llarning tayanch inshootlari ostida joylashtirilishi mumkin.

“OAVda keltirilayotgan jadval faqatgina obyektlar haqidagi umumiy ma’lumotni aks ettirgan bo‘lib, ular buzilishidan dalolat bermaydi. Ushbu yer maydonlari yo‘l o‘tkazgich, Bektemir yo‘lidan TXAYga va TXAYdan Bektemir yo‘liga (Farg‘ona yo‘lining davomi) tushuvchi yo‘llar qurilishi sababli davlat va jamoat foydasiga jalb etilmoqda”, — deyiladi xabarda.

Qo‘shimcha qilinishicha, hozirda Toshkent shahrida yo‘l-transport infratuzilmasini jadal takomillashtirish ishlari davom etmoqda. Ushbu yo‘l o‘tkazgich, shu jumladan, uning tarkibidagi yondosh yo‘llar shaharga kirishda transport oqimini tezlashtirish, shaharga kirish qismida tirbandliklarning va avariyaviy holatlarning oldini olishga xizmat qiladi.