San’atkor Xalimaxonning singlisi IIB xodimlari tomonidan olib ketilganiga rasmiy izoh berildi
Ma’lum qilinishicha, Hanifa Ibragimova qidiruvda bo‘lgan va u yashiringan manzilida qo‘lga olingan.
Ijtimoiy tarmoqda san’atkor Xalimaxon Ibragimovaning singlisi 21-iyun kuni 15 nafar IIB xodimlari tomonidan hech qanday asossiz ravishda olib ketilgani haqida videoxabar tarqaldi. Holat yuzasidan Toshkent viloyati Ichki ishlar boshqarmasi axborot xizmati rahbari Bobur To‘laganov rasmiy izoh berdi.
Ma’lum qilinishicha, Jinoyat ishlar bo‘yicha Nurafshon shahar sudi fuqaro 1982-yilda tug‘ilgan H. I. O‘zbekiston Respublikasi Jinoyat Kodeksining 168-moddasi (Firibgarlik) 4-qismida nazarda tutilgan jinoyatni sodir etganlikda ayblanayotganligi, jinoyatining ijtimoiy xavflilik darajasi va hozirgi kunda dastlabki tergovdan bo‘yin tovlab yurganligi hamda unga nisbatan qidiruv e’lon qilinganlik holatlarni inobatga olib, fuqaro H. I.ga nisbatdan sirtdan qamoqqa olish tarzidagi ehtiyot chorasini qo‘llash bo‘yicha ajrim qilgan va uning ijrosini ta’minlash Ichki ishlar organlariga yuklatilgan.
Mazkur ajrimga asosan, Toshkent tumani IIB xodimlari tomonidan fuqaro H.I.ning (qidiruvda bo‘lgan) yashiringan manzili aniqlanib, ushlangan va ehtiyot chorasi sifatida “qamoq” qo‘llanilgan. Hozirda holat yuzasidan dastlabki tergov harakatlari olib borilmoqda.
“Shu o‘rinda murojaat muallifini va ayrim OAV vakillarini mazkur holat yuzasidan tergov harakatlari olib borilayotganligini inobatga olib, jarayonga maqola, materiallar yoki boshqalar orqali ta’sir o‘tkazmaslikka hamda axborotga bir tomonlama yondashmaslikda chaqiramiz”, — deyiladi xabarda.
