Qo‘qonda defektologning singlisi 3 yoshli bolani kaltakladi
Bola ko‘p yig‘lab yuborganidan asabiylashgan ayol uning yuziga qo‘li bilan urgan.
Ijtimoiy tarmoqda Farg‘ona viloyati Qo‘qon shahridagi 39-son ixtisoslashgan logoped bog‘chada nogiron bola bog‘cha opa tomonidan muntazab kaltaklanib kelingani haqida xabar tarqaldi. Mazkur holat viloyati IIB tomonidan o‘rganib chiqildi.
Ma’lum bo‘lishicha, joriy yilning 17-iyun kuni viloyat IIB “102” qisqa raqamiga Qo‘qon shahrida istiqomat qiluvchi E. M. (ayol) murojaat qilib, shaharning O‘rdatagi ko‘chasida joylashgan bolalar bog‘chasida tarbiyachi uning farzandini urib, tan jarohati yetkazganligi haqidagi xabar kelib tushgan.
Olib borilan tergovga qadar tekshiruv harakatlari davomida yuqoridagi holat maktabgacha ta’lim tashkilotida emas, defektolog mutaxassisning yashash uyida sodir bo‘lganligi ma’lum bo‘lgan. Ko‘rsatilgan manzildagi xonadonda A. Gʻ. (ayol) kasbi defektolog bo‘lgan opasi D. A. ga yordamchi sifatida qarashib turganligini, joriy yilning 17 iyun kuni bolalardan biri, voyaga yetmagan A. A. (suratdagi bola) ko‘p yig‘lab yuboroganligi sababli asabiylashib, uni yuziga qo‘li bilan urganini bildirgan.
O‘tkazilgan sud-tibbiy ekspertizasining xulosasida voyaga yetmagan A. A. ga ko‘p davom etmaydigan yengil tan jarohati yetkazilganligi ko‘rsatilgan.
Mazkur holat yuzasidan fuqaro A. Gʻ. ga nisbatan Qo‘qon shahar IIB tomonidan Ma’muriy javobgarlik to‘g‘risidagi kodeksning 52-middasi (yengil tan jarohati yetkazish) 2-qismi bilan ma’muriy tartibda hujjatlar rasmiylashtirilib, 25 iyun kuni Jinoyat ishlari bo‘yicha Qo‘qon shahar sudiga yuborilgan.
