Tadbirkorga yengillik yaratmasdan turib, natijaga erishib bo‘lmaydi — Shavkat Mirziyoyev
Prеzident investitsiya loyihalari taqdimoti bilan tanishdi
Bugun, 27-iyun kuni Prezident Shavkat Mirziyoyev Toshkent shahrida amalga oshirilayotgan investitsiya loyihalari taqdimoti bilan tanishdi. Bu haqda Prezident Matbuot xizmati xabar berdi.
Bu yil Toshkentda qariyb 4 milliard dollar investisiya hisobiga 500 dan ziyod loyiha rejalashtirilgan. Bugungi kunga kelib, shundan 1 milliard 500 million dollari o‘zlashtirilgan. 120 million dollarlik 71 ta loyiha ishga tushirilib, 5 mingdan ortiq ish o‘rni yaratilgan. Umumiy miqdori 2 milliard 300 million dollarlik yana 450 ta loyiha bo‘yicha ish olib borilmoqda.
Davlat rahbari birinchi yarim yillikdagi ko‘rsatkichlar yetarli emasligini ta’kidlab, kechikayotgan loyihalarning muammosini hal qilish, investisiyalar jalb etishni ko‘paytirish bo‘yicha ko‘rsatmalar berdi.
Taqdimotda “Yangihayot” industrial texnoparkida olib borilayotgan ishlar ham ko‘rib chiqildi.
Bu haqda O‘zbekiston Prezidentining 2021 yil 4 fevraldagi qarorida belgilangan edi. Ushbu texnopark uchun 210 gektar maydon ajratilgan. Bosh reja ishlab chiqilib, bugungi kunda muhandislik-kommunikasiya tarmoqlarini barpo etish boshlangan.
Prezident bu ham iqtisodiy, ham ijtimoiy jihatdan muhim loyiha ekanini ta’kidladi.
“Hech qaysi davlatda tadbirkorga yengillik yaratmasdan turib, natijaga erishib bo‘lmaydi. Bu texnopark tadbirkorlar uchun qulay maydon bo‘lishi kerak. Import o‘rnini bosadigan, ko‘proq odamlarni ish bilan ta’minlaydigan loyihalarga e’tibor qaratish kerak”, – dedi Shavkat Mirziyoyev.
Birinchi bosqichda texnoparkning 110 gektar maydoni auksionda sotilgan. Ularda oshxona jihozlari, qandolatchilik va to‘qimachilik mahsulotlari, santexnika tovarlari, polietilen va metall buyumlar ishlab chiqarish loyihalari joylashtirilgan. Umuman, texnoparkda tashkil etiladigan korxonalarda 20 ming ish o‘rni yaratilishi mo‘ljallangan.
Toshkentda xizmat ko‘rsatish sohasi bo‘yicha ham imkoniyatlar katta. O‘tgan besh oyda bu sohada 5 ming 500 ta loyiha doirasida 183 mingta ish o‘rni yaratilgan.
Davlat rahbari aholining talabi va imkoniyatlari o‘sib borayotganini, shundan kelib chiqib, xizmatlarni keng ko‘lamda rivojlantirish zarurligini ta’kidladi. Yoshlarni bu soha bo‘yicha o‘qitib, xizmatlar sifatini va bandlikni oshirish yuzasidan ko‘rsatmalar berildi.
