Bugun haydovchilar kutgan qarorni imzoladim—Shavkat Mirziyoyev
Prezident videoselektorda “tonirovka” masalasiga to‘xtaldi.
Bugun, 28-iyun kuni Prezident Shavkat Mirziyoyev raisligida ilmga asoslangan urug‘chilik va agrotexnologiyalar hisobiga paxta ishlab chiqarish hajmini oshirish hamda paxtani chuqur qayta ishlash asosida to‘qimachilik mahsulotlari eksportini ko‘paytirish chora-tadbirlari yuzasidan videoselektor yig‘ilishi bo‘lib o‘tmoqda.
Unda Davlat rahbari “tonirovka” masalasiga to‘xtalib o‘tdi.
“Har bir islohotimiz, taklif va tashabbuslarimiz, bu – eng avvalo inson qadri uchun.
Shu bois, xalqimizga qanday yengilliklar bersak, u bizdan rozi bo‘ladi, degan savol barcha rahbarlarni har kuni, har daqiqa o‘ylantirishi kerak.
Har gal joylarga chiqqanimda oddiy-oddiy odamlar bilan uchrashib, muammolarini eshitaman, yana qancha aholimizda shunday muammolar borligi haqida o‘ylayman va unga yechim qidiraman.
Ommaviy axborot vositalari, ijtimoiy tarmoqlarda ko‘tarilayotgan masalalardan ham xabardorman.
Mana, bugungi kunda mamlakatimizda yengil avtomashinalar soni 3,5 milliondan oshdi. Haydovchilarimizda ham ko‘plab e’tirozlar to‘planib qolgan.
Shu bois, bugun haydovchilar va yo‘lovchilar anchadan beri kutgan, ularning kayfiyatini ko‘taradigan qarorni imzoladim”, — dedi Prezident.
Biroz avval ayrim manbalarda O‘zbekistonda transport vositalari oynalarini tonirovka qilish narxi tushishi kutilayotgani xabar berilgan edi. Loyihaga ko‘ra:
➖orqa va old oyna tonirovkasi — BHMning 15 baravari miqdorida (4,5 mln so‘m);
➖orqa yon oynalar tonirovkasi — BHMning 1 baravari miqdorida (300 ming so‘m) belgilanishi kutilmoqda.
