Jizzaxda tug‘ilgan nogiron chaqaloq 2 soat o‘tib, vafot etdi
Aniqlanishicha, bolaning ota-onasi aka-singilning farzandlari bo‘lgan.
Ijtimoiy tarmoqda Jizzax viloyatining Do‘stlik tumanida qarindoshlar o‘rtasidagi nikohdan tug‘ma nuqsonli chaqaloq dunyoga kelgani aytilgan videolavha tarqaldi. Holat yuzasidan viloyati sog‘liqni saqlash boshqarmasi rasmiy ma’lumot berdi.
Aniqlanishicha, 2022 yil 4 iyun kuni soat 04:00 larda 1994-yilda tug‘ilgan fuqaro X. T. tuman markaziy shifoxonasining tug‘uruq bo‘limiga murojaat qilgan. Unga “Homiladorlik 2. Tug‘uruq 2. 35 hafta 4 kun. Homilaning chanog‘i bilan kelishi” tashxisi qo‘yilgan.
Shu kuni soat 06:10 da “Ko‘p nuqsonli chaqaloq. Tug‘ma ixtioz og‘ir darajasi” tashxisi bilan og‘irligi 2800 gramm, bo‘yi 47 santimetr bo‘lgan, muddatiga yetgan o‘g‘il jinsli nogiron chaqaloq dunyoga kelgan. Ko‘rsatilgan reanimasion tibbiy muolajalarga qaramasdan, hayotga zid qo‘shma asoratlar bilan tug‘ilgan go‘dak shu kuni 08:20 da vafot etgan.
Ma’lum bo‘lishicha, mazkur tug‘ilgan ko‘p nuqsonli chaqaloqning ota-onasi aka-singilning farzandlari bo‘lgan. Ushbu oila ikkala tomonning ham ikkinchi turmushi hisoblanadi. Ularning avvalgi turmushlaridan bir nafardan sog‘lom farzandlari bor. Ayolning mazkur homiladorlik davri normal kechgan.
“Tibbiyotda aksariyat hollarda yaqin qarindoshlar nikohi tufayli bolalar turli irsiy nuqsonlar bilan dunyoga kelishi isbotlangan. Xususan, bunday oilalar tufayli tug‘ilajak bolada tug‘ma aqliy zaiflik, xromosom kasalliklar, daun sindromi, aqliy va jismoniy o‘sishdagi jiddiy oqsoqlik kabi xavfli xastaliklar kelib chiqishi mumkin”— deyiladi xabarda.
Javohirbek TURSUNOV
