Samarqandda yo‘l bo‘yidagi do‘kon yonib ketdi
Oqibatda do‘kon binosi va undagi mahsulotlarga zarar yetgan.
Samarqand viloyatining Pastdarg‘om tumanida 27-iyun kuni savdo do‘konida yong‘in chiqdi. Bu haqda viloyat Favqulodda vaziyatlar boshqarmasi Matbuot xizmati xabar berdi.
Qayd etilishicha, soat 22:44 da Pastdarg‘om tumani “Yangiobod” MFY hududidan o‘tuvchi 4R-46 avtomobil yo‘lining 25-kilometrida joylashgan, yakka tartibdagi tadbirkor 1989-yilda tug‘ilgan fuqaro Sh. U. ga tegishli yengil konstruksiyali savdo do‘konida yong‘in sodir bo‘layotganligi haqida tuman FVBga xabar kelib tushgan.
Yong‘inni bartaraf etishga FVBning 3 ta yong‘in-qutqaruv ekipaji jalb etilgan. Ular soat 22:47 da voqea joyiga yetib borib, 23:06 da olov qurshab olingan va yong‘in soat 00:11 da bartaraf etilgan.
Dastlabki ma’lumotlarga ko‘ra, omborxona va savdo do‘konining taxminan 100 kvadrat metr maydonida shift, tom qismi va uning ichidagi aralash mahsulotlari yonib zararlangan.
Hodisa oqibatida tan jarohati olgan va halok bo‘lganlar yo‘q. Hozirda yong‘inning kelib chiqish sababi va zarari aniqlanmoqda.
